Luana Vjollca rikthehet në Top Channel, zbulohet formati dhe kur nis

Luana Vjollca pritet të rikthehet në ekranin e Top Channel nga janari i vitit 2027, pas disa vitesh shkëputjeje nga televizioni ku ka zhvilluar një pjesë të rëndësishme të karrierës së saj.

Lajmi është raportuar fillimisht nga revista “Bordo”, ndërsa burime të “Prive By LS” kanë konfirmuar gjithashtu se moderatorja po përgatitet për rikthimin në Top Channel.

Sipas të njëjtave burime, Luana do të rikthejë formatin e njohur argëtues “Shiko Kush Luan”, i cili pritet të transmetohet në orarin kryesor të së dielës.

Emisioni, që ndërthur lojërat, muzikën dhe intervistat me personazhe të njohur, ka qenë një nga projektet më të spikatura të moderatores gjatë kohës që ishte pjesë e Top Channel.

Sa i përket kohëzgjatjes, raportimet bëjnë të ditur se “Shiko Kush Luan” është planifikuar të vazhdojë deri në fillim të marsit, kur pritet të nisë sezoni i ri i spektaklit të humorit “Portokalli”.

Rikthimi i Luanës në Top Channel ishte përfolur prej muajsh, ndërsa “Prive By LS” kishte paralajmëruar më herët se moderatorja mund të rikthehej në televizionin ku u bë e njohur për publikun.

Pas largimit nga Top Channel, Luana vijoi angazhimet televizive me projekte të tjera, ndërsa mbeti aktive edhe në muzikë dhe në rrjetet sociale.

Megjithatë, deri më tani nuk ka një njoftim zyrtar nga Top Channel apo vetë Luana Vjollca për datën e saktë të nisjes së emisionit.

Nëse planet e raportuara realizohen, janari do të shënojë rikthimin e moderatores me një nga formatet më të njohura të karrierës së saj, këtë herë në mbrëmjet e së dielës.